” شوية نقط ع حروف سياسية ” بقلم عصام عزالدين

* ” الأزعر” لي كان لاحق الوزير ” الآدمي” طارق المجذوب
بل “مكنسة” بمشهد من التنمّر معيب ومش مقبول ابدا ً
بل هو يستحق عقاب جزائي …
يعني ضروري .. ولازم نضبط ونحدد إنو الثورة هي ( فوضى واعية) .
وإنو الثائر بيفرق كتير عن المخرب ، والمناضل مش لازم يتسلح بأدوات القاتل .

* ” السوقية والفجور” اللفظي لي بيستعملن وئام وهاب بكل إطلالة إعلامية …
ما بعرف قديش بتخدمو هو شخصيا َ وقديش مسيئة للجهة لي ” بتشغلو” .. وقديش فيها إحراج للوسيلة الإعلامية لي بيكون ضيفها .. خاصة مع اعتيادو على استعمال بذاءات لفظية واباحية من عيار +18 وتحديدا بالمناسبات الأخيرة يعني بعد ناقص يشلح تيابو او يسحب الشفرة من تحت لسانو !!!
وهيدا بيطرح السؤال .. انو معقول هيدا “الشتام المحترف الزقاقي” البذيئ .. يكون حليف للسياسي الهادئ الخلوق الوقور الحاج حسين الخليل؟
بالمختصر .. الناس بس تسمعو بتعتبر قلة الحيا تبعو هي نوع من إستعمال “فائض القوة ” تبع فريق معين .. ساندو وراضي عن خطابو بالشكل والمضمون .
او سكتوه ، أو هذبو لسانو ، أو اتركوه للقضاء يحاسبو .

* اليوم الرئيس عون بخصوص فاجعة بيروت قال إجاه تقرير عن موجودات خطيرة بالعنبر ١٢ بالمرفأ وهو ما كان عارف إنو هلقد خطيرة .. طيب فخامتك هلق عرفت؟
المرة الجاي إذا كنت بعدك طيب .. يا ريت تاخد إجراءات فورية وجدية …
قديش مضر وجود “عجوز ” بعمر لازم يكون فيه مرتاح ببيتو وخاضع للعناية الصحية والعائلية المناسبة لحالتو النفسية والجسدية بموقع كتير حساس .. خاصة إنو بحاجة للتركيز والجهد وضبط الأفكار والذاكرة والتصرفات؟
ما بعرف .. بس الأكيد ، انو السنوات الماضية لي مرقت على ما يسمى بالعهد القوي أعطتنا أجوبة كتير مؤلمة وقاسية .

* واخيرا ً .. بالنسبة لإطلالة الأمين العام لي كانت منتظرة من الجميع اليوم … فإننا نرجوا الله أن يغفر لأمواتنا وامواتكم …
والشكر جزيل لعميق مشاعر كل اللبنانيين والاشقاء والاصدقاء من الدول العربية والأجنبية .
وهناك بالتأكيد تقصير وإهمال “محلي فقط” ..
الله لا يسامح المقصر
وبخصوص لي صار .. كارثة ونشالله وبتقطع .
وآخر دعوانا الحمد لله .