الرئيسية » بريد القراء » وجهة نظر: حديث البلد اليوم عن الأنتخابات والمرشحين ، يعني كأنه كل المشاكل في طريقها للحل …

وجهة نظر: حديث البلد اليوم عن الأنتخابات والمرشحين ، يعني كأنه كل المشاكل في طريقها للحل …

كتب : محمد عمرو
حديث البلد اليوم عن الأنتخابات والمرشحين ، يعني كأنه كل المشاكل في طريقها للحل …
طيب يا أخوان وحتى ما نطول السيرة ، لو راجعنا سجلات المرشحين خلال نشاطهم في البرلمان ، أكيد أكيد سجلهم أوراق بيضاء كقلوبهم وعقولهم البيضاء …
تركونا من السجلات والخزعبلات والتصريحات والقال والقيل ، خلينا نروح بأتجاه الأنجازت ، كان في فقر أزددنا فقرا ، كان في فاسدين أزددنا فسادا ومفسدين ، وأذا بدنا نحكي ما منخلص …
رح نطوي الصفحة ع أساس الزعما اليوم شادين الهمة وقرروا يشبعوا وبدهم يعملوا أنتخابات نزيهة وهيفا ونانسي واليسا …
فكانت حسابات الحقلة غير حسابات البيدر …
أن معقول يتغير النواب وما يتغير الزعيم … لا بل أكيد ما دام الزعيم باقي يعني نواب الزعيم باقيين …
يا أخوان سلمنا جدلا معكم أن المرشحين نالوا ثقة الزعما والحمدلله مطيعين … يبقى السؤال ما دام هالقد حريصين على مصالحنا وعنا ثقة كبيرة بمحبتهم …
الحل موجود طلب صغير أكيد ما بيزعج أحد ، ولا بروح شي من طريق أحد وخصوصا اصحاب البطون الكبيرة اللي اكلي الأخضر واليابس …
فهمنا بدكم الحل وبكفي حكي …
اصدار مرسوم معجل مكرر بإلغاء كافة الديون الشخصية لكل المواطنين من البنوك …يعني المواطن فرحان بيسحب من البنك معاشه وبرجع يدفعوا هو واقف ما بيتحرك من مطرحه …
الغاء الرسوم الضريبية عن الأملاك الخاصة للمواطنين في البلديات والدوائر العقارية … هيك هيك ما عم تقدم شي البلديات ؟؟؟
الغاء الرسوم عن ميكانيك السيارات ما دام ع الطرقات ما في زفت ، ومواقف للسيارات مسيطر عليها اصحاب النفوذ …
الغاء الرسوم المدرسية في المدارس الرسمية والجامعة اللبنانية ، وفرض أقساط مدروسة على المدارس والجامعات الخاصة …
تأمين وسائل نقل عام باصات قطار بواخر لنقل الركاب خط الجنوب والشمال …
تخفيض اسعار اللحوم والخضار وتأمين الدعم لأصحاب المزارع الزراعية والحيوانية …
تفعيل تقديمات الضمان الصحي ووزارة الصحة وأصدار بطاقة صحية لكل مواطن تبعده عن الذل الذي يتعرض له في المستشفيات والصيدليات والمراكز المذكورة أعلاه …
تأمين سكن لكل مواطن يحمل بطاقة أنتخابية يعني المواطن يعيش بخربة والمنتخب يعيش بقصر هيدي مش عدالة ؟
ما عنا مشكلة تعملوا زعما ونواب ووزراء ، مطالبنا صغيرة على قياس كل مواطن هيدا اذا بتعتبرونا مواطنين …
اتحداك يا من تذهب لصندوق الأقتراع يتحقق مطلب واحد مما ذكر أعلاه ، وما شوفك عم تلعن الساعة اللي انتخبت فيها …
يا أخوان معكم وقت اذا صارت الأنتخابات تفكروا منيح بمطالبكم لأن اذا ما سمعوا صوتكم اليوم وحققوا مطالبكم ما تفرح لما يجي النائب يعزي بإبنك او ابوك مات على مدخل المستشفى لأن ما عندوا واسطة يتحكم …
فكر منيح وقبل ما تسجل أسم المرشح تذكر شو بدك تأمن لمستقبلك ومستقبل أولادك اللي عم يهاجروا ويموتوا وتموت وما عنده او عندك القدرة تروح او يجي يحضر الدفن …
بخاطرك ما بدي أسمع صوتك بعد الأنتخابات وشوفك عم تتظاهر وتحرق دواليب لأن مطالبك ما تحققت ؟؟؟
16864562_1199779220143213_2153901453911077214_n
28167420_1561827023938429_1221670100690263938_n

اضف رد

لن يتم نشر البريد الإلكتروني . الحقول المطلوبة مشار لها بـ *

*